fietstocht oetzet deur Historiese verainen

Kört verslagje van de fietstocht oetzet deur Historiese verainen old gemainte ’t Zaandt 2025

Reden veur deze fietsrit laans wat plekken oet oorlog is omreden dat we ien 2025 80 joar vrijhaid vieren. Gegevens dij wie bruukt hemmen vienen joe op dit webstee weerom mit n route en n GPX bestandje dij joe n beetje op pad helpt. Ie kennen de rit dus ook n keer zulf fietsen as joe dat willen, t verhoal van dij tied kennen je ook op de webstee vienen.

Op 13 juni 2025 hemmen wie ons mit zo’n stuk of zeuventien minsen verzoameld bie “Landgoed De Camping” in ofwachten van Joël Stoppels dij ons begelaiden gait en noatuurlek het ain en anner vertellen zel. Nou zol Joël ons ien zien olle jeep begelaiden, mor dij was net nou lebait. Dus kwam Joël ook op fiets noar de camping, (oet stad, dus dij har der aal n rit opzitten). Joël het ons dou alvast ien t kört ain anner verteld hou noa D-day de geallieerden optrokken bennen noar ien t lest noord grunnen. Dizze fietsrit gait veuraal over de gevechten om en ien Holwier.

Har k aal zegd dat hartstikke mooi weer was? Nou dat was t, gain spier kold, zun der bie, dus wie konnen op pad. Ien kalm tempo want veul van ons reden den wel op n fiets mit n elektriek wiendje ien de rug, mor nait apmoal, en wie harren ook nait drok ja. 

Van ’t Zaandt bennen wie noar Leerms fietst en dou verder richting Oosterwietwerd. Via Arwerd en Krewerd kwammen dou oet bie t monument veur degenen dij heur leven verloren bennen ien de stried om Holwier. Joël het n indrukwekkend verhoal hollen over dij gevechten en wat dit veur de minsen ien Holwier betaikend het. Ook ien de kerk van Holwier bennen nog herinners oet dij tied terug te vienen, doar vertelde Joël ons t verhoal van de gijzeling van de manluu ien de kerk. 

Van Holwier bennen wie noar de bunkers van Nansum reden woar de kanonnen stoan hemmen dij het de geallieerden en de minsen ien Holwier t leven zo stoer mokt hemmen. Hier harren we ook mooi tied om onder de woakende blik van n zwoan ons kadetje achter knopen te kriegen. 

Dou weer op pad noar Holwier en noa n stop bie boerderij Ooster Felwerd richting Lösdörp en Glins reden. Ien Glins hemmen we, noa Joël bedankt te hemmen veur de verhoalen dij bie ons veul indruk mokt hemmen, afschaaid nomen van hom, hai ging weer op hoes aan. 

Dou op pad noar ’t Zaandt, nog eem stopt bie boerderij Huizingoa bie restant van n klain bunkertje en deur noar de Camping. Doar konnen we nog eem noaproaten en doarnoa kon elk zien weegs goan.